وفاقی حکومت نے نئے مالی سال 2026-27 کے بجٹ کی تیاری شروع کر دی ہے جبکہ ذرائع کے مطابق تقریباً 15 نئے ٹیکسز متعارف کرانے پر غور کیا جا رہا ہے۔
ذرائع کے مطابق حکومت نے ایڈہاک ریلیف 2011 تا 2015 کو تنخواہوں میں ضم کرنے کے معاملے پر حتمی فیصلہ کرنے سے قبل تفصیلی رپورٹ طلب کر لی ہے۔ اگرچہ وفاقی حکومت کی جانب سے یہ ریلیف پہلے ہی تنخواہوں میں شامل کیا جا چکا ہے، تاہم صوبائی حکومت نے تاحال اس کی باضابطہ توثیق نہیں کی۔
حکومت نے متعلقہ اداروں کو ہدایت کی ہے کہ فیصلے کے مالی اثرات، ممکنہ اخراجات اور اب تک حاصل ہونے والے فوائد و نقصانات پر مشتمل مکمل رپورٹ پیش کی جائے۔
ذرائع کا کہنا ہے کہ نئے بجٹ میں اساتذہ کی اپگریڈیشن، پولیس اہلکاروں کی ترقیاں، رسک الاؤنس اور سرکاری ملازمین کی تنخواہوں میں ممکنہ اضافے کے مختلف آپشنز بھی زیر غور ہیں۔
بجٹ تیاری کے حوالے سے ذرائع نے بتایا ہے کہ تمام رپورٹس موصول ہونے کے بعد حکومت ایڈہاک ریلیف اور دیگر مراعات سے متعلق حتمی فیصلہ کرے گی۔
