افغانستان کرکٹ ٹیم کے سابق فاسٹ بولر شاپور زدران 38 سال کی عمر میں انتقال کر گئے۔ افغانستان کرکٹ بورڈ نے ان کے انتقال کی تصدیق کرتے ہوئے گہرے دکھ اور افسوس کا اظہار کیا ہے۔
افغانستان کرکٹ بورڈ کے مطابق شاپور زدران کینسر کے مرض میں مبتلا تھے اور بھارت کے ایک اسپتال میں زیر علاج تھے، جہاں وہ انتقال کر گئے۔
افغانستان کرکٹ بورڈ نے اپنے بیان میں کہا کہ شاپور زدران افغانستان کرکٹ کے ابتدائی اور اہم کھلاڑیوں میں شامل تھے، جنہوں نے قومی ٹیم کے لیے نمایاں خدمات انجام دیں۔
شاپور زدران کے انتقال پر سابق پاکستانی کرکٹر شاہد آفریدی نے بھی افسوس کا اظہار کرتے ہوئے کہا کہ ان کی بیماری کے بارے میں سن کر بہت دکھ ہوا، وہ مدد کے لیے ہمیشہ موجود ہیں۔
افغانستان کرکٹ بورڈ کے مطابق شاپور زدران کی نماز جنازہ اور تدفین سے متعلق اعلان اہل خانہ کی مشاورت کے بعد کیا جائے گا۔
شاپور زدران نے افغانستان کی جانب سے 44 ایک روزہ بین الاقوامی اور 36 ٹی ٹوئنٹی انٹرنیشنل میچز میں نمائندگی کی۔ وہ اپنی تیز رفتار باؤلنگ اور جارحانہ انداز کے باعث افغانستان کرکٹ کے نمایاں کھلاڑیوں میں شمار ہوتے تھے
