آئی سی سی ٹی ٹوئنٹی ورلڈ کپ میں پاکستان اور بھارت کی ویمنز ٹیموں کے درمیان اہم اور سنسنی خیز مقابلہ آج ایجبسٹن، برمنگھم میں کھیلا جائے گا۔
پاکستان ویمن ٹیم، کپتان فاطمہ ثنا کی قیادت میں مکمل اعتماد کے ساتھ میدان میں اترے گی۔ قومی ٹیم کو اپنی اسپن بولنگ اٹیک، خصوصاً سعدیہ اقبال اور ندا ڈار سے شاندار کارکردگی کی امید ہے۔
میچ کے دوران اسٹیڈیم میں موجود بڑی جنوبی ایشیائی کمیونٹی کی وجہ سے پرجوش اور دباؤ سے بھرپور ماحول متوقع ہے، جو مقابلے کو مزید دلچسپ بنا دے گا۔
دوسری جانب پاکستان ویمن ٹیم کی کپتان فاطمہ ثنا نیٹ پریکٹس کے دوران معمولی انجری کا شکار ہو گئی ہیں۔ اطلاعات کے مطابق فالو تھرو کے دوران گیند ان کے دائیں گھٹنے پر لگی، تاہم انہوں نے واقعے کو معمولی قرار دیتے ہوئے کہا ہے کہ وہ مکمل طور پر فٹ ہیں اور میچ کے لیے دستیاب ہوں گی۔
کرکٹ ماہرین کے مطابق پاکستان اور بھارت کے درمیان یہ مقابلہ نہ صرف پوائنٹس ٹیبل کے لیے اہم ہے بلکہ دونوں ٹیموں کے لیے ٹورنامنٹ میں برتری حاصل کرنے کا بھی فیصلہ کن موقع ہوگا۔
