پشاور(ویب ڈیسک) میں خیبرپختونخوا حکومت نے عوام اور ٹرانسپورٹ سیکٹر کو ریلیف فراہم کرنے کے لیے اہم اقدام اٹھاتے ہوئے صوبہ بھر کے سی کلاس بس اڈوں کی فیس ایک ماہ کے لیے معاف کرنے کا اعلان کر دیا ہے۔
سرکاری اعلامیے کے مطابق اس فیصلے کے تحت ایک ماہ کے دوران بس اڈوں کی مد میں ہونے والے تقریباً 140 ملین روپے کے اخراجات صوبائی حکومت خود برداشت کرے گی، تاکہ ٹرانسپورٹرز اور مسافروں پر مالی بوجھ کم کیا جا سکے،حکام کے مطابق پشاور کے مصروف لاہوراڈہ اڈے سمیت محکمہ ٹرانسپورٹ کے زیر انتظام تمام بس اڈوں کو ان کے اصل مالی نقصان کے مطابق ادائیگیاں کی جائیں گی، تاکہ ان کے انتظامی امور متاثر نہ ہوں،یہ فیصلہ 3 اپریل کو ہونے والے صوبائی کابینہ کے 50ویں اجلاس میں کیا گیا، جس میں ٹرانسپورٹ نظام کو سہارا دینے اور عوامی سہولت کو مدنظر رکھتے ہوئے اس اقدام کی منظوری دی گئی،دریں اثنا محکمہ بلدیات نے اس حوالے سے صوبے بھر کے تمام ٹی ایم اوز (تحصیل میونسپل آفیسرز) کو باقاعدہ مراسلہ جاری کر دیا ہے، جس میں فیصلے پر فوری عملدرآمد کی ہدایت کی گئی ہےحکومت کے اس اقدام کو ٹرانسپورٹ حلقوں کی جانب سے خوش آئند قرار دیا جا رہا ہے، جبکہ عوام کو بھی کرایوں میں ممکنہ کمی کی صورت میں براہ راست ریلیف ملنے کی توقع ہے
