محکمہ اوقاف خیبرپختونخوا نے فکسڈ پے پر تعینات 21 ضلعی و تحصیل خطباء کی ملازمت میں مزید 6 ماہ کی توسیع کردی
پشاور (نیوزرپورٹر)
محکمہ اوقاف، حج، مذہبی و اقلیتی امور خیبرپختونخوا نے فکسڈ پے پر تعینات 21 ضلعی اور تحصیل خطباء و آئمہ کی ملازمتوں میں مزید چھ ماہ کی توسیع کی منظوری دے دی ہے۔
محکمہ اوقاف کی جانب سے 27 جولائی 2026 کو جاری ہونے والے باضابطہ نوٹیفکیشن کے مطابق چیف ایڈمنسٹریٹر اوقاف/سیکرٹری محکمہ اوقاف، حج، مذہبی و اقلیتی امور نے خطباء و آئمہ سروس رولز 1968 کے رول 4 کے تحت مذکورہ ملازمین کی خدمات میں عارضی بنیادوں پر مزید چھ ماہ کی توسیع کی منظوری دی ہے۔
اعلامیہ میں کہا گیا ہے کہ توسیع شدہ تقرریوں کی مدت چھ ماہ سے زیادہ نہیں ہوگی اور تمام متعلقہ قانونی و ضابطہ جاتی تقاضے پورے کیے جائیں گے۔ متعلقہ خطباء اور آئمہ کو محکمہ خزانہ حکومت خیبرپختونخوا کی جانب سے گرانٹ اِن ایڈ کے تحت ادائیگیاں کی جائیں گی۔
توسیع پانے والوں میں مختلف اضلاع کے ڈسٹرکٹ خطباء اور تحصیل خطباء شامل ہیں، جن میں تورغر، مردان، صوابی، بٹہ گرام، ٹانک، چارسدہ، نوشہرہ، کتلنگ، رازڑ، ہری پور، بٹ خیلہ، تل، بٹاگرام، ڈگر (بونیر)، لعل قلعہ (دیر لوئر)، بنوں، پٹن (کوہستان)، ایبٹ آباد، واری (دیر اپر) اور تخت نصرتی (کرک) کے خطباء شامل ہیں۔
اعلامیہ کے مطابق مختلف ملازمین کی سابقہ مدت ملازمت ختم ہونے کی تاریخ کے فوراً بعد نئی مدت کا اطلاق ہوگا، جبکہ زیادہ تر تقرریوں میں توسیع جنوری 2027 تک مؤثر رہے گی
