پشاور: 9 مئی 2023 کو بانی پی ٹی آئی کی گرفتاری کے بعد ریڈیو پاکستان پر حملے سے متعلق کیس میں چالان جمع نہ ہونے کے خلاف انسداد دہشت گردی عدالت میں درخواست دائر کر دی گئی ہے۔
درخواست ریڈیو اسٹیشن ڈائریکٹر کی جانب سے دائر کی گئی جس میں مؤقف اختیار کیا گیا ہے کہ واقعہ کو دو سال سے زائد عرصہ گزر چکا ہے مگر تاحال کیس میں چالان جمع نہیں کیا گیا۔ درخواست میں کہا گیا ہے کہ پراسیکیوشن جان بوجھ کر چالان جمع نہیں کر رہی اور کیس کو طول دینے کی کوشش کی جا رہی ہے۔
درخواست میں سپیشل پراسیکیوٹر نعمان الحق کاکا خیل کے خلاف کارروائی کی بھی استدعا کی گئی ہے اور عدالت سے اپیل کی گئی ہے کہ انہیں فوری طور پر چالان جمع کرانے کا حکم دیا جائے۔
درخواست گزار کے مطابق 9 مئی 2023 کو پرتشدد مظاہرین نے ریڈیو پاکستان کی عمارت پر حملہ کیا اور توڑ پھوڑ کی۔ کیس میں پاکستان تحریک انصاف کے موجودہ اور سابق اراکین اسمبلی کو بھی نامزد کیا گیا ہے۔
مزید کہا گیا ہے کہ کیس میں مزید ملزمان کی شناخت اور تصدیق پنجاب فرانزک سائنس ایجنسی اور نادرا کے ذریعے کی گئی ہے، تاہم اس کے باوجود چالان جمع نہ ہونا سوالیہ نشان ہے۔
درخواست میں یہ الزام بھی عائد کیا گیا ہے کہ صوبائی حکومت، وزراء اور ممبران اسمبلی کے دباؤ کے باعث کیس میں پیش رفت نہیں ہو رہی، جس کی وجہ سے انصاف کی فراہمی میں تاخیر ہو رہی ہے۔
