خیبر پختونخوا کے ایک ضلع میں پیرا میڈیکل عملے کی بھرتیوں میں مبینہ بے ضابطگیوں کی انکوائری کے بعد محکمہ صحت نے متعلقہ ڈسٹرکٹ ہیلتھ آفیسر کو دوسرے ضلع میں تعینات کردیا ہے جبکہ افسر کیخلاف محکمانہ انکوائری اور چارج شیٹ کا عمل بھی جاری ہے
محکمانہ انکوائری رپورٹ میں بھرتیوں کے عمل کے دوران متعدد سنگین بے ضابطگیوں کی نشاندہی کی گئی ہے
رپورٹ کے مطابق ای ٹی ای اے سکریننگ کیلئے مقررہ 50فیصد معیار کو کم کرکے 33فیصد کیا گیا جبکہ 53مشتہر آسامیوں کے مقابلے میں 67امیدواروں کو تقرریاں دی گئیںانکوائری کمیٹی نے یہ بھی قرار دیا کہ بعض غیر مقامی امیدواروں کو ترجیح دی گئی جبکہ متعلقہ اضلاع کے اہل امیدوار نظر انداز ہوئے
اسی طرح متعدد امیدواروں کو انٹرویو کیلئے مناسب طور پر مطلع نہ کئے جانے کے باعث تقریبا 563امیدوار انتخابی عمل سے باہر ہوگئے
رپورٹ میں انکوائری کے نو میں سے چھ الزامات ثابت قرار دئیے گئے ہیں جبکہ تین الزامات ثابت نہیں ہوسکے کمیٹی نے ثابت شدہ الزامات کی بنیاد پر متعلقہ افسر کیخلاف خیبر پختونخوا ایفیشنسی اینڈ ڈسپلن رولز 2011کے تحت میجر پینلٹی پر غور کرنے کی سفارش بھی کی ہے
محکمہ صحت نے معاملے کو محض تبادلے تک محدود رکھنے کے بجائے افسر کے خلاف محکمانہ کارروائی اور چارج شیٹ کے عمل کو آگے بڑھا دیا ہے جبکہ ان بھرتیوں کا دوبارہ جائزہ لینے اور دیگر اضلاع میں بھی اسی نوعیت کی تقرریوں کی جانچ پڑتال کی سفارش کی گئی ہے۔
