بنوں میں سکیورٹی فورسز کی کارروائیاں، 24 دہشت گرد ہلاک: آئی ایس پی آر
راولپنڈی: پاک فوج کے شعبۂ تعلقات عامہ (آئی ایس پی آر) کے مطابق ضلع بنوں اور ملحقہ علاقوں میں گزشتہ 24 گھنٹوں کے دوران سکیورٹی فورسز اور قانون نافذ کرنے والے اداروں نے مختلف انٹیلی جنس بیسڈ آپریشنز اور کلیئرنس کارروائیاں کرتے ہوئے 24 دہشت گرد ہلاک کر دیے۔
آئی ایس پی آر کے مطابق یہ کارروائیاں بنوں میں حالیہ خودکش حملے میں ملوث عناصر اور ان کے سہولت کاروں کے خلاف جاری آپریشنز کا حصہ ہیں۔
ترجمان کے مطابق کارروائیوں کے دوران دہشت گردوں کے قبضے سے بھاری مقدار میں اسلحہ، گولہ بارود اور دیگر جنگی سامان بھی برآمد کیا گیا۔ ہلاک ہونے والے دہشت گرد مختلف دہشت گرد کارروائیوں اور شہریوں پر حملوں میں مبینہ طور پر ملوث تھے۔
آئی ایس پی آر نے کہا کہ علاقے میں کلیئرنس اور انٹیلی جنس بیسڈ آپریشنز بلا تعطل جاری رہیں گے، جبکہ خودکش حملے کے ذمہ داروں اور ان کے سہولت کاروں کو انصاف کے کٹہرے میں لانے کے لیے کارروائیاں منطقی انجام تک پہنچائی جائیں گی۔
دریں اثنا، صدرِ مملکت آصف علی زرداری نے بنوں اور ملحقہ علاقوں میں کامیاب کارروائیوں پر سکیورٹی فورسز کو خراجِ تحسین پیش کرتے ہوئے کہا کہ دہشت گردی کے خلاف جنگ میں فورسز کی پیشہ ورانہ صلاحیت، عزم اور قربانیاں قابلِ ستائش ہیں، اور دہشت گرد عناصر کے خلاف کارروائیاں جاری رہنی چاہئیں۔
