پاکستان تحریک انصاف میں بیرسٹر ڈاکٹر محمد علی سیف کو اڈیالہ جیل سے متعلق امور کے لیے پارٹی نمائندہ مقرر کرنے پر غور کیا جا رہا ہے، جبکہ پولیٹیکل کمیٹی ختم کرکے اہم فیصلوں کا اختیار پارلیمانی کمیٹی کو منتقل کرنے کی تجویز بھی سامنے آئی ہے۔
تفصیلات کے مطابق ان تجاویز کی حتمی توثیق بانی پی ٹی آئی عمران خان کی تشکیل کردہ پارٹی کور کمیٹی سے حاصل کی جائے گی۔
اس مرحلے پر بیرسٹر سیف کی تقرری یا پولیٹیکل کمیٹی کے خاتمے کا حتمی فیصلہ سامنے نہیں آیا۔
اس حوالے سے سینیٹر مشال یوسفزئی کا کہنا ہے کہ بیرسٹر ڈاکٹر محمد علی سیف کو اڈیالہ جیل امور کے لیے نمائندہ مقرر کرنے سے عمران خان کے لیے آسانیاں پیدا ہوں گی۔
پارٹی میں زیر غور تجاویز کے مطابق پولیٹیکل کمیٹی کے خاتمے کی صورت میں فیصلہ سازی کے اختیارات پارلیمانی کمیٹی کو دینے پر بھی مشاورت کی جا رہی ہے، تاہم اس حوالے سے حتمی پیش رفت کور کمیٹی کی توثیق کے بعد ہی واضح ہوگی۔
