مظفرآباد: آزاد جموں و کشمیر قانون ساز اسمبلی کے انتخابات 2026 کے دوسرے مرحلے کے غیر سرکاری اور غیر حتمی نتائج کے مطابق پاکستان مسلم لیگ (ن) نے 14 نشستوں پر کامیابی حاصل کرکے برتری حاصل کر لی، جبکہ پاکستان پیپلزپارٹی 5 نشستیں جیتنے میں کامیاب رہی۔
دوسرے مرحلے میں مظفرآباد ڈویژن کی 8 اور مہاجرین کی 12 نشستوں پر پولنگ ہوئی۔ مظفرآباد ڈویژن میں ووٹنگ شام 6 بجے تک پرامن ماحول میں جاری رہی، تاہم حلقہ ایل اے 27 میں شدید بارش، خراب موسم اور لینڈ سلائیڈنگ کے باعث انتخابی عملہ اور پولنگ سامان مقررہ مقامات تک نہ پہنچ سکا، جس کے نتیجے میں تمام پولنگ اسٹیشنوں پر انتخابات ملتوی کر دیے گئے۔ اس حلقے میں پولنگ کی نئی تاریخ بعد میں جاری کی جائے گی۔
غیر سرکاری نتائج کے مطابق ایل اے 25 نیلم ویلی سے مسلم لیگ (ن) کے شاہ غلام قادر، ایل اے 26 نیلم ویلی سے پاکستان پیپلزپارٹی کے میاں عبدالوحید، ایل اے 29 مظفرآباد سے پیپلزپارٹی کے سردار مختار خان، ایل اے 30 مظفرآباد سے مسلم لیگ (ن) کے مصطفیٰ بشیر عباسی، ایل اے 32 مظفرآباد سے مسلم لیگ (ن) کے راجہ فاروق حیدر اور ایل اے 33 مظفرآباد سے پاکستان پیپلزپارٹی کے دیوان علی خان قمر چغتائی کامیاب قرار پائے۔
غیر سرکاری نتائج کے مطابق مہاجرین اور کشمیر ویلی کی بیشتر نشستوں پر بھی مسلم لیگ (ن) نے کامیابی حاصل کرتے ہوئے مجموعی طور پر 14 نشستیں اپنے نام کر لیں، جبکہ پاکستان پیپلزپارٹی 5 نشستوں کے ساتھ دوسرے نمبر پر رہی۔ تاہم الیکشن کمیشن کی جانب سے حتمی اور سرکاری نتائج جاری کیے جانے کا عمل جاری ہے۔
