ایرانی سپریم نیشنل سکیورٹی کونسل کے سیکریٹری محمد باقر ذوالقدر نے امریکی صدر ڈونلڈ ٹرمپ کے حالیہ بیان پر سخت ردعمل دیتے ہوئے کہا ہے کہ ایران کو دھمکیاں دینے کا سلسلہ بند کیا جائے، بصورت دیگر جواب مختلف انداز میں دیا جائے گا۔
محمد باقر ذوالقدر نے اپنے بیان میں کہا کہ وہ "امریکہ کے اس صدر سے مخاطب ہیں جس نے 9 کروڑ 10 لاکھ ایرانیوں کو دھمکیاں دی ہیں”۔ انہوں نے امریکی قیادت کو مشورہ دیا کہ ایرانی عوام سے احترام کے ساتھ بات کی جائے، ورنہ ایران بھی سخت جواب دینے کی صلاحیت رکھتا ہے۔
ایرانی عہدیدار نے کہا کہ صدر ٹرمپ اس سے قبل بھی ایران کی ہزاروں سال پرانی تہذیب کے حوالے سے سخت بیانات دے چکے ہیں، تاہم ان کے مطابق ماضی میں ایسی پالیسیوں کا نتیجہ امریکہ کے لیے ناکامی اور بعد ازاں مذاکرات کی جانب واپسی کی صورت میں نکلا۔
یہ ردعمل امریکی صدر ڈونلڈ ٹرمپ کے ایک حالیہ ٹی وی انٹرویو کے بعد سامنے آیا، جس میں انہوں نے کہا تھا کہ اگر ایران کسی معاہدے پر پہنچتا ہے تو یہ بہتر ہوگا، بصورت دیگر امریکہ سخت اقدامات کر سکتا ہے۔
حالیہ بیانات کے بعد ایران اور امریکہ کے درمیان سفارتی کشیدگی مزید نمایاں ہوگئی ہے، جہاں دونوں ممالک کے اعلیٰ حکام ایک دوسرے کے بیانات پر سخت ردعمل کا اظہار کر رہے ہیں۔
