: خیبر پختونخوا کے معروف اور تاریخی طبی ادارے پیراپلیجک سنٹر کے چیف ایگزیکٹو آفیسر ڈاکٹر محمد الیاس نے قانونی خلاف ورزیوں، اختیارات میں مداخلت اور ادارہ جاتی کشیدگی کے باعث اپنے عہدے سے استعفیٰ دے دیا۔
ذرائع کے مطابق ڈاکٹر محمد الیاس نے اپنا استعفیٰ وزیر اعلیٰ خیبر پختونخوا کے نام ارسال کردہ خط میں جمع کرایا، جس میں انہوں نے ادارے کے اندر مبینہ قانونی اور انتظامی بے ضابطگیوں پر شدید تحفظات کا اظہار کیا ہے۔
استعفیٰ میں مؤقف اختیار کیا گیا ہے کہ نئے بورڈ کی تشکیل کے بعد ایسے فیصلے کیے گئے جو پیراپلیجک سنٹر ایکٹ 2009 اور ادارہ جاتی حکمرانی کے بنیادی اصولوں سے متصادم ہیں۔ ڈاکٹر محمد الیاس کے مطابق متعدد اہم فیصلے مقررہ قانونی طریقہ کار کے بغیر کیے گئے جبکہ ان معاملات میں انتظامیہ سے مناسب مشاورت بھی نہیں کی گئی۔
انہوں نے اپنے خط میں الزام عائد کیا کہ اختیارات میں مسلسل مداخلت اور انتظامی امور میں غیر ضروری دباؤ کے باعث ادارے کا قانونی و انتظامی ڈھانچہ متاثر ہوا، جس سے پیشہ ورانہ ماحول اور ادارے کی کارکردگی پر منفی اثرات مرتب ہوئے۔
ڈاکٹر محمد الیاس نے کہا کہ موجودہ حالات میں مؤثر اور اصولی انداز میں فرائض کی انجام دہی ممکن نہیں رہی، اسی لیے انہوں نے عہدے سے الگ ہونے کا فیصلہ کیا۔
تاہم اس حوالے سے بورڈ انتظامیہ یا متعلقہ حکام کی جانب سے تاحال کوئی باضابطہ ردعمل سامنے نہیں آیا۔
