صوبائی وزیر صحت خیبرپختونخوا خلیق الرحمن کی زیر صدارت پشاور سے تعلق رکھنے والے منتخب اراکینِ اسمبلی (ایم این ایز اور ایم پی ایز) کا ایک اہم مشاورتی اجلاس منعقد ہوا۔
اجلاس میں پشاور کے دیہی علاقوں میں صحت کے شعبے کو درپیش مسائل اور ہسپتالوں کی حالتِ زار کا تفصیلی جائزہ لیا گیا۔
اجلاس میں رکن قومی اسمبلی شاندانہ گلزار خان اور اراکینِ صوبائی اسمبلی شیر علی آفریدی ،سمیع اللہ ،فضل الہی ، محمد عاصم خان سمیت محکمہ صحت کے اعلیٰ حکام نے شرکت کی۔
اجلاس میں پشاور کے مضافاتی اور دیہی علاقوں میں موجود بنیادی مراکزِ صحت (BHUs) اور دیہی مراکزِ صحت (RHCs) میں درپیش مسائل ڈاکٹروں کی حاضری اور ادویات کی فراہمی کو یقینی بنانے پر زور دیا گیا۔
منتخب نمائندوں نے اپنے حلقوں میں صحت کے حوالے سے درپیش عوامی مسائل سے وزیر صحت کو آگاہ کیا، جس پر وزیر صحت نے فوری اقدامات کی یقین دہانی کرائی۔
پشاور رورل ایریا کے ہسپتالوں میں طبی آلات کی کمی کو دور کرنے اور عمارتوں کی مرمت و تزئین کے حوالے سے بھی اہم فیصلے کیے گئے۔
وزیر صحت نے محکمہ صحت کے افسران کو ہدایت جاری کی کہ وہ دیہی علاقوں کے ہسپتالوں کا باقاعدگی سے معائنہ کریں تاکہ غریب اور متوسط طبقے کو ان کی دہلیز پر علاج معالجے کی بہترین سہولیات میسر آ سکیں۔
