انسداد دہشت گردی کی خصوصی عدالت نے دہشت گردی اور ریاست مخالف سرگرمیوں میں ملوث ملزم کی ضمانت کی درخواست مسترد کر دی۔ کیس کی سماعت اے ٹی سی جج فرید خان علیزئی نے کی، جس میں ملزم ولی اللہ کے وکیل اور سرکاری وکیل عدالت میں پیش ہوئے۔
پراسیکیوشن کے مطابق ملزم ولی اللہ دہشت گردی اور ریاست مخالف سرگرمیوں میں ملوث ہے اور اس کا تعلق ایک کالعدم تنظیم سے بتایا گیا ہے۔ اس کے خلاف تھانہ سی ٹی ڈی خیبر میں مقدمہ درج ہے جبکہ اس وقت اس سے مزید تفتیش جاری ہے۔ پراسیکیوٹر نے عدالت کو آگاہ کیا کہ ملزم مختلف دہشت گردانہ کارروائیوں میں ملوث رہا ہے، لہٰذا اس کی ضمانت کی درخواست مسترد کی جائے۔
دوسری جانب ملزم کے وکیل نے عدالت میں مؤقف اختیار کیا کہ ان کے موکل کے خلاف الزامات بے بنیاد ہیں اور اسے ضمانت پر رہا کیا جائے۔ تاہم عدالت نے فریقین کے دلائل سننے کے بعد ملزم کی ضمانت کی درخواست خارج کرنے کا حکم جاری کر دیا۔
