امریکی صدر ڈونلڈ ٹرمپ کا کہنا ہے کہ اسلام آباد میں ملاقات اچھی رہی اور بیشتر نکات پر اتفاق ہوگیا ہے۔
اپنے حالیہ بیان میں امریکی صدر ڈونلڈ ٹرمپ کا کہنا تھا کہ اہم جوہری معاملے پر اتفاق نہ ہوسکا۔
امریکی صدر ٹرمپ نے کہا کہ امریکی نیوی فوری آبنائے ہرمز کی ناکہ بندی کرے گی، لگا تھا آبنائے ہرمز پر آزادانہ نقل وحرکت کی اجازت ہوگی لیکن ایران نے ایسا ہونے نہیں دیا۔
ٹرمپ کا کہنا تھا کہ بارودی سرنگیں کہاں ہیں،علم صرف ایران کو ہے اور ایران کا یہ اقدام عالمی سطح پر بھتہ خوری ہے، دنیا کے رہنما اور امریکا اس بھتہ خوری کا شکار نہیں ہوں گے، اپنی نیوی کو کہا ہے ایران کو ٹول دینے والے جہازوں کو تلاش کریں اور جو بھی ایران کو ٹول ادا کرے گا ، اسے محفوظ راستہ نہیں ملے گا۔
ان کا کہنا تھا کہ ہم آبنائے ہرمز پر بارودی سرنگوں کو تباہ کرنا شروع کریں گے اور جو بھی ہمارے جہازوں پر فائرنگ کرے گا اسے تباہ کریں گے۔
انکا مزید کہنا تھا کہ جے ڈی وینس، اسٹیو وٹکوف ،جیرڈ کشنر نے اسلام آباد مذاکرات پر بریفنگ دی، مذاکرات وزیر اعظم شہباز شریف ، فیلڈ مارشل عاصم منیرکی قیادت میں ہوئے جبکہ شہباز شریف اور عاصم منیر غیر معمولی صلاحیتوں کی حامل شخصیات ہیں۔
