وزیراعظم شہباز شریف نے سعودی عرب کے ولی عہد محمد بن سلمان سے ٹیلیفونک رابطہ کرکے سعودی عرب پر ہونے والے ایرانی حملوں کی شدید مذمت کی اور اس عزم کا اظہار کیا کہ پاکستان ہر مشکل گھڑی میں سعودی عرب کے شانہ بشانہ کھڑا رہے گا۔
میڈیا رپورٹس کے مطابق دونوں رہنماؤں کے درمیان ہونے والی گفتگو میں خطے میں جاری کشیدگی اور سکیورٹی صورتحال پر تفصیلی تبادلہ خیال کیا گیا۔ وزیراعظم نے سعودی عرب کے الجبیل آئل فسیلیٹی پر ہونے والے حملے کی سخت الفاظ میں مذمت کرتے ہوئے پاکستان کی جانب سے غیر متزلزل یکجہتی اور مکمل حمایت کا اعادہ کیا۔
وزیراعظم شہباز شریف نے کہا کہ پاکستان کی حکومت اور عوام ہمیشہ اپنے سعودی بھائیوں اور بہنوں کے ساتھ کھڑے رہیں گے، جس طرح سعودی قیادت نے ہر مشکل وقت میں پاکستان کا ساتھ دیا ہے۔
انہوں نے موجودہ کشیدگی کے دوران سعودی قیادت کے تحمل اور دانشمندی کو سراہتے ہوئے کہا کہ پاکستان دیگر ممالک کے ساتھ مل کر خطے میں امن کے قیام کے لیے بھرپور سفارتی کوششیں کر رہا ہے۔ وزیراعظم نے مشرق وسطیٰ میں کشیدگی کم کرنے کے لیے پاکستان کی جاری سفارتی کاوشوں سے بھی ولی عہد کو آگاہ کیا۔
وزیراعظم نے اس موقع پر شاہ سلمان بن عبدالعزیز آل سعود کے لیے نیک تمناؤں اور پرتپاک سلام کا اظہار بھی کیا۔
دوسری جانب سعودی ولی عہد محمد بن سلمان نے خطے میں امن و استحکام کے لیے پاکستان کی کوششوں کو سراہتے ہوئے دونوں ممالک کے درمیان قریبی تعلقات کو مزید مضبوط بنانے کے عزم کا اعادہ کیا۔
