پٹرول کی نئی قیمت 458 ڈیزل کی 520 روپے فی لیٹر مقرر

حکومت کی جانب سے پیٹرول کی نئی قیمت 458 روپے 40 پیسے فی لیٹر کردی گئی۔

وزیر خزانہ محمداورنگزیب کے ہمراہ مشترکہ پریس کانفرنس کرتے ہوئے وزیر پیٹرولیم علی پرویز ملک کا کہنا تھا کہ حکومت کی طرف سے صدر آصف زرداری کا شکر گزار ہوں، تمام وزرائے اعلیٰ نے نازک صورتحال میں ہماری رہنمائی کی، جنگ کی وجہ سے عالمی منڈیوں میں توانائی قیمتوں میں بھونچال آیا اور جنگ کی آگ نے پوری دنیا کو لپیٹ میں لیا ہوا ہے۔

وزیر پیٹرولیم علی پرویز ملک کا کہنا تھا کہ قوم کو اتحاد کی اتنی ضرورت ہے جو تاریخ میں کبھی نہیں تھی۔

علی پرویز ملک کا کہنا تھا کہ حکومت مشکل اور ذمہ دارانہ فیصلے کرنے جا رہی ہے، طوفان برپا کرنے میں حکومت کا کوئی کردار نہیں تھا، ہمیں جلد از جلد جنگ کی آگ بجھانے کی کوشش کرنی چاہیے۔

ان کا کہنا تھا کہ دبئی اور اومان کی منڈیوں سے پاکستان 80 سے 90 فیصد توانائی حاصل کرتا ہے، ڈیزل کی قیمت 250 ڈالر فی بیرل سے بھی زیادہ ہو چکی ہے۔

انہوں نے کہا کہ وزیراعظم نے 60 فیصد سرکاری گاڑیوں کو گراؤنڈ کیا، یکم مارچ سے اب تک حکومت 129 ارب روپے عوامی تحفظ پر خرچ کر چکی ہے، کفایت شعاری کر کے ہم نے معاملات بہتر طریقے سے چلانے کی کوشش کی۔

علی پرویز ملک کا کہنا تھا کہ دیگر ممالک میں بھی توانائی اور پیٹرول کیلئے قطاریں لگی ہوئی ہیں، ہم نے ایندھن کی فراہمی میں کوئی تکلیف نہیں آنے دی، ہمارے پاس عالمی معاہدے بھی موجود ہیں۔
#Pakistan #petrol #PetrolPrices #dieselprices