پشاور میں غیرقانونی طور پر مقیم افغان شہریوں کے خلاف آپریشن مزید تیز، بازاروں اور رہائشی علاقوں میں کارروائیاں
اشرف روڈ، مونگ پھلی مارکیٹ، آٹا مارکیٹ، سبزی و فروٹ منڈی سمیت مختلف علاقوں میں چھاپے، درجنوں افراد زیر حراست، جعلی افغان سٹیزن کارڈ رکھنے والے افراد بھی پکڑے گئے
پشاور (نامہ نگار) صوبائی دارالحکومت پشاور میں غیرقانونی طور پر مقیم افغان شہریوں کے خلاف آپریشن کا دائرہ مزید وسیع کر دیا گیا ہے۔ پولیس اور متعلقہ اداروں نے شہر کے مختلف تجارتی مراکز کے ساتھ رہائشی علاقوں میں بھی کارروائیاں شروع کر دی ہیں، جس کے دوران درجنوں افراد کو حراست میں لے لیا گیا۔
ذرائع کے مطابق کارروائیوں کے دوران اشرف روڈ، مونگ پھلی مارکیٹ، آٹا مارکیٹ، سبزی منڈی، فروٹ منڈی اور دیگر اہم تجارتی مراکز کو چیک کیا گیا۔ اس دوران زیر حراست افراد سے افغان سٹیزن کارڈ (اے سی سی) اور پروف آف رجسٹریشن (پی او آر) کارڈ بھی برآمد ہوئے۔
حکام کی جانب سے مختلف مقامات پر مشتبہ افراد کی شناخت اور سفری و رہائشی دستاویزات کی جانچ پڑتال کا سلسلہ جاری ہے۔ ذرائع کا کہنا ہے کہ گزشتہ روز مہاجرین کی دستاویزات کی جانچ کے دوران جعلی افغان سٹیزن کارڈ رکھنے والے بعض افراد کو بھی حراست میں لیا گیا۔
ذرائع کے مطابق آپریشن کا مقصد غیرقانونی طور پر مقیم افراد کی نشاندہی اور دستاویزات کی تصدیق کرنا ہے، جبکہ شہر کے مختلف علاقوں میں پولیس اور متعلقہ اداروں کی کارروائیاں جاری ہیں۔