پشاور (سپورٹس رپورٹر) وزیر اعلیٰ خیبر پختونخوا کے مشیر کھیل تاج محمد خان ترند نے کہا ہے کہ قومی اور بین الاقوامی سطح پر خیبر پختونخوا کے کھلاڑیوں کی کارکردگی قابل فخر ہے ہر قومی اور بین الاقوامی ایونٹ میں میڈلز جیت کر کھلاڑی صوبے اور ملک وقوم کا نام روشن کر رہے ہیں، صوبائی حکومت کھلاڑیوں کی فلاح وبہبود اور انہیں ہر قسم کی سہولیات کی فراہمی کے لئے قدامات اٹھا رہی ہے۔ وہ خیبر پختونخوا بیڈمنٹن ایسوسی ایشن کی جانب سے ساﺅتھ ایشین ریجنل بیڈمنٹن چیمپئن شپ میں میڈلز جیتنے والے کھلاڑیوںکے اعزاز میں منعقدہ تقریب سے خطاب کر رہے تھے۔ ڈائریکٹر جنرل سپورٹس تاشفین حیدر، ریجنل سپورٹس آفیسر کاشف فرحان، چیف کوچ شفقت اللہ، پراجیکٹ ڈائریکٹر ارباب فیض، خیبر پختونخوا بیڈمنٹن ایسوسی ایشن کے سیکرٹری میاں صداقت شاہ،پشاور سپورٹس کمپلیکس کے ایڈمنسٹریٹریوسف آفریدی اور ایسوسی ایشن کے دیگر عہدیدار بھی موجود تھے۔ مشیر کھیل نے امید ظاہر کی کہ کھلاڑی سفر جاری اور کامیابیاں حاصل کرتے رہیں گے۔ انہوں نے کہا کہ حکومت کھلاڑیوں کی ہر ممکن حوصلہ افزائی کر رہی ہے نیشنل گیمز میں میڈلز جیتنے والے کھلاڑیوں میں اڑھائی کروڑ روپے سے زائد کے نقد انعامات تقسیم کئے گئے ہیں، حکومت کھلاڑیوں کے ساتھ ہے اور ان کے ساتھ ہر ممکن تعاون کرے گی۔ قبل ازیں انہوں نے ساﺅتھ ایشین بیڈمنٹن چیمپئن شپ میں میڈلز جیتنے والے کھلاڑیوں حسنین، محمد زید، فہد احمد، عمر جہانگیر، محمد حاشرشاہ، قاری محمد عمر اور دیگر عالمی مقابلوں میں اچھی کارکردگی کا مظاہرہ کرنے والے شبیر، سمیع خان اور قاری محمد عدنان میں انعامات تقسیم کئے، انہوں نے حکومت کی جانب سے گولڈ میڈلسٹ کھلاڑیوں کے لئے ایک ایک لاکھ روپے، سلور میڈلسٹ کے لئے 75، 75 ہزار روپے اور برونز میڈلسٹ کھلاڑیوں کے لئے 50، 50 ہزار روپے انعام کا اعلان کیا۔ کوچز ندیم خان، بشریٰ خان، ملک فراز اور حیات اللہ کو بھی انعامات دیئے گئے۔ ساﺅتھ ایشین بیڈمنٹن چیمپئن شپ میں قومی ٹیم میں خیبر پختونخوا کے چھ کھلاڑی شامل تھے جنہوں نے اچھی کارکردگی کا مظاہرہ کرتے ہوئے پانچ گولڈ، پانچ سلور اور چار برونز میڈلز جیتے تھے۔
