فیڈرل انوسٹی گیشن ایجنسی(ایف آئی اے)نے پشاور میں جعلی کرنسی گروہ کے خلاف کاروائی کرتے ہوئے لاکھوں روپے کی جعلی کرنسی برآمد کرلی،
ایف آئی اے اینٹی کرپشن سرکل (اے سی سی) پشاور نے کارروائی کرتے ہوئے کورئیر سروسز کے ذریعے جعلی پاکستانی کرنسی ملک کے مختلف حصوں میں بھجوانے کی کوشش ناکام بنا دی۔
کاروائی کے دوران مجموعی طور پر 14 لاکھ 70 ہزار روپے مالیت کی جعلی پاکستانی کرنسی برآمد کر کے ایک اہم ملزم کو گرفتار کرلیا گیا۔
کارروائی ایک شکایت کی بنیاد پر عمل میں لائی گئی، جس کے بعد ایف آئی اے حکام نے جعلی کرنسی پر مشتمل کورئیر پارسلز کا سراغ لگایا اور تحقیقات کے دوران زید زیب ولد عالم زیب خان، سکنہ غریب آباد، شبقدر، چارسدہ کو گرفتار کرلیا۔
ابتدائی تفتیش کے دوران گرفتار ملزم نے مبینہ طور پر انکشاف کیا کہ وہ جعلی کرنسی تیار/فراہم کرنے والے ایک منظم گروہ سے جعلی نوٹ وصول کرکے کورئیر پارسلز کے ذریعے ملک کے مختلف شہروں میں بھجوانے میں سہولت کاری کرتا تھا۔
گرفتار ملزم اور دیگر غیر گرفتار ملزمان کے خلاف متعلقہ قوانین کے تحت مقدمہ درج کرلیا گیا ہے۔
ایف آئی اے اے سی سی پشاور نے جعلی کرنسی کے اصل ماخذ، سپلائی چین اور وسیع نیٹ ورک کا سراغ لگانے کے لیے مزید تفتیش شروع کردی ہے۔
ایف آئی اے حکام کے مطابق ملوث تمام عناصر کو قانون کے مطابق کارروائی کرتے ہوئے انصاف کے کٹہرے میں لایا جائے گا۔
