آل خیبر پختونخواہ جونیئر و سینیئر فل کانٹیکٹ کراٹے چیمپئن شپ کامیابی سے اختتام پذیر

خیبر پختونخواہ فل کانٹیکٹ کراٹے ایسوسی ایشن کے زیرِ اہتمام، ڈائریکٹوریٹ جنرل آف سپورٹس خیبر پختونخواہ کے تعاون سے ہادی انٹرنیشنل کراٹے اکیڈمی (کراٹے ہیڈکوارٹرز)، گلبہار پشاور میں آل خیبر پختونخواہ جونیئر و سینیئر فل کانٹیکٹ کراٹے چیمپئن شپ کامیابی کے ساتھ منعقد ہوئی۔چیمپئن شپ میں صوبے بھر سے تعلق رکھنے والے مرد و خواتین، جونیئر اور سینیئر کھلاڑیوں نے بھرپور شرکت کی اور اعلیٰ درجے کی تکنیکی مہارت، نظم و ضبط اور بہترین کھیل کا مظاہرہ کرتے ہوئے حاضرین سے بھرپور داد وصول کی۔
تقریب کے مہمانِ خصوصی، بین الاقوامی کراٹے ریفری، صدر خیبر پختونخواہ فل کانٹیکٹ کراٹے ایسوسی ایشن اور چیف انسٹرکٹر شیہان صاحبزادہ الہادی تھے۔ انہوں نے کامیاب مرد و خواتین کھلاڑیوں میں ٹرافیاں، میڈلز اور اسناد تقسیم کیں۔ اپنے خطاب میں انہوں نے کھلاڑیوں کی محنت، جذبے اور شاندار کارکردگی کو سراہتے ہوئے کہا کہ ایسے مقابلے نوجوانوں میں اعتماد، نظم و ضبط اور صحت مند سرگرمیوں کے فروغ میں اہم کردار ادا کرتے ہیں۔چیمپئن شپ میں انتہائی جونیئر کھلاڑیوں نے بھی غیر معمولی صلاحیتوں کا مظاہرہ کیا، جسے شائقین اور منتظمین نے بے حد سراہا۔
نمایاں کارکردگی دکھانے والے مرد کھلاڑیوں میں ابو طلحہ، یحییٰ ہادی، محمد سنان، عبداللہ، سید احسان اللہ، محمد یوسف، فواد علی، محمد زید اور عبدالرقیب شامل تھے، جبکہ خواتین میں جویریہ ہادی، یشفا ناصر، ایشال اور حورین نے شاندار کھیل پیش کرتے ہوئے ٹرافیاں اور اسناد اپنے نام کیں۔
تقریب کے اختتام پر شیہان صاحبزادہ الہادی اور مسز ناصر خان نے کامیاب کھلاڑیوں میں انعامات اور اسناد تقسیم کیں۔ شرکاء، کوچز اور والدین نے کامیاب اور منظم چیمپئن شپ کے انعقاد پر خیبر پختونخواہ فل کانٹیکٹ کراٹے ایسوسی ایشن اور ڈائریکٹوریٹ جنرل آف سپورٹس خیبر پختونخواہ کی کاوشوں کو سراہا اور مستقبل میں بھی ایسے معیاری مقابلوں کے باقاعدہ انعقاد کی امید ظاہر کی۔