فیصل کریم کنڈی سے عامر طفیل نے گورنر ہاؤس پشاور میں ملاقات کی۔ اس موقع پر شہاب علی شاہ اور احمد کنڈی بھی موجود تھے۔
ملاقات کے دوران صوبے میں گیس کی فراہمی، انفراسٹرکچر کی بہتری، صنعتی شعبے کو درپیش مسائل اور گیس رائلٹی سے متعلق امور پر تفصیلی تبادلہ خیال کیا گیا۔
گورنر خیبرپختونخوا فیصل کریم کنڈی نے کہا کہ صوبے میں گیس کی بوسیدہ اور پرانی پائپ لائنوں کی تبدیلی کے عمل کو جلد از جلد مکمل کیا جانا چاہیے تاکہ صارفین کو بہتر اور محفوظ گیس فراہمی یقینی بنائی جا سکے۔ انہوں نے اس امر پر اطمینان کا اظہار کیا کہ رشاکئی انڈسٹریل اسٹیٹ سمیت صوبے کے مختلف صنعتی زونز کو بلا تعطل گیس فراہم کی جا رہی ہے، تاہم صنعتی ترقی کے لیے گیس ٹیرف میں کمی کو بھی ناگزیر قرار دیا۔
گورنر نے زور دیا کہ گیس چوری اور دیگر انتظامی مسائل کے مؤثر حل کے لیے محکمہ گیس اور صوبائی حکومت کے درمیان مسلسل رابطہ اور قریبی تعاون ضروری ہے۔ انہوں نے کہا کہ اس حوالے سے چیف سیکرٹری اور محکمہ گیس کو مشترکہ حکمت عملی اختیار کرنی ہوگی تاکہ درپیش مسائل کا پائیدار حل نکالا جا سکے۔
اجلاس میں اس فیصلے پر بھی عملدرآمد کے لیے اقدامات تیز کرنے پر اتفاق کیا گیا کہ گیس رائلٹی کی 50 فیصد رقم گیس انفراسٹرکچر اور نظام کی بہتری پر خرچ کی جائے گی۔ شرکاء نے اس مقصد کے حصول کے لیے تمام ممکنہ اقدامات اٹھانے کے عزم کا اظہار کیا۔
اجلاس میں اس بات پر بھی زور دیا گیا کہ گیس کے نظام کو جدید خطوط پر استوار کرکے صارفین اور صنعتی شعبے کو بہتر سہولیات فراہم کی جائیں، جس سے صوبے کی معاشی سرگرمیوں اور صنعتی ترقی کو مزید فروغ ملے گا۔
