تھانہ پیزو پولیس نے کامیاب کارروائی کرتے ہوئے سنگین مقدمات میں انتہائی مطلوب اشتہاری، چور اور ڈکیت طاہر شاہ کو ساتھی سمیت ہلاک کردیا، جبکہ جائے وقوع سے اسلحہ بھی برآمد کرلیا گیا۔ پولیس کے مطابق کارروائی شیخ بدین کے پہاڑی علاقے میں خفیہ اطلاع پر کی گئی۔ ہلاک ہونے والے اشتہاری کی شناخت طاہر شاہ ولد ظاہر شاہ سکنہ ورغڑ پیزو کے نام سے ہوئی۔
پولیس کے مطابق طاہر شاہ پیزو کے پہاڑی سلسلوں میں گاڑیوں کے مسافروں اور ڈرائیوروں کو لوٹنے والے گروہ کا سرغنہ تھا اور مختلف سنگین وارداتوں میں پولیس کو مطلوب تھا۔ طاہر شاہ کے خلاف قتل، اقدام قتل، چوری، ڈکیتی، منشیات، پولیس پر فائرنگ، غیر قانونی اسلحہ اور دیگر جرائم کے 11 مقدمات درج تھے۔
تفصیلات کے مطابق پولیس کو خفیہ ذرائع سے اطلاع ملی تھی کہ انتہائی مطلوب اشتہاری طاہر شاہ اپنے دیگر ساتھی کے ہمراہ شیخ بدین کے پہاڑی علاقے میں موجود ہے۔ اطلاع ملتے ہی ڈی پی او لکی مروت سجاد احمد صاحبزادہ (PSP) کی خصوصی ہدایات پر ایس ایچ او پیزو شفقت خان نے بھاری پولیس نفری کے ہمراہ مذکورہ علاقے میں پہنچ کر سرچ آپریشن شروع کیا۔
پولیس پارٹی جب مشتبہ مقام کے قریب پہنچی تو مسلح ملزمان نے پولیس پارٹی پر فائرنگ شروع کردی۔ پولیس جوانوں نے فوری طور پر پوزیشنیں سنبھالیں اور حق خود حفاظتی کے تحت جوابی فائرنگ کی۔ پولیس اور ملزمان کے درمیان فائرنگ کا تبادلہ کچھ دیر تک جاری رہا۔ فائرنگ رکنے کے بعد پولیس نے علاقے میں سرچ آپریشن کیا تو مطلوب اشتہاری طاہر شاہ اور اس کا ایک ساتھی ہلاک حالت میں پائے گئے۔
اس دوران دوسرے ہلاک ملزم کی شناخت عابد ولد زرولی سکنہ پیزو حال شیخ بدین پہاڑ کے نام سے ہوئی۔ پولیس کے مطابق عابد بھی طاہر شاہ کا ساتھی تھا اور مختلف وارداتوں میں اس کے ہمراہ ملوث رہا ہے۔ پولیس کے مطابق عابد کا مزید کریمنل ریکارڈ چیک کیا جا رہا ہے، جبکہ جائے وقوع سے ملزمان کے قبضے میں موجود اسلحہ برآمد کرکے پولیس نے قبضے میں لے لیا ہے۔
ڈی پی او لکی مروت سجاد احمد صاحبزادہ (PSP) نے کامیاب کارروائی پر ایس ایچ او پیزو اور کارروائی میں حصہ لینے والے پولیس افسران و جوانوں کو شاباش دی۔ انہوں نے کہا کہ ضلع لکی مروت میں سنگین جرائم میں ملوث عناصر اور قانون شکنوں کے خلاف بلاامتیاز کارروائیاں جاری رکھی جائیں گی۔ عوام کے جان و مال کے تحفظ اور ضلع میں امن و امان کے قیام پر کوئی سمجھوتا نہیں کیا جائے گا۔
ڈی پی او نے مزید کہا کہ پولیس جوان پوری جرأت، پیشہ ورانہ مہارت اور عزم کے ساتھ جرائم پیشہ عناصر کا مقابلہ کر رہے ہیں، جبکہ قانون کو چیلنج کرنے والے عناصر کے خلاف قانون کے مطابق سخت کارروائی عمل میں لائی جائے گی۔
دریں اثنا لکی مروت میں مشہ منصور کے قریب فائرنگ کے واقعے میں 2 اشتہاری ڈاکوؤں سمیت 3 افراد جاں بحق ہو گئے، جن میں بدنام زمانہ اشتہاری آفتاب اور اس کا ساتھی بلاول ساکنان چوارخیل شامل ہیں۔
پولیس کے مطابق ڈاکوؤں کی فائرنگ سے راہگیر افتخار علی سکنہ مشہ منصور جاں بحق ہوا جب کہ پولیس مقابلے میں آفتاب کا ساتھی بلاول ولد شوکت اللہ بھی ہلاک ہوگیا۔ ہلاک آفتاب اور بلاول چوارخیل کے رہائشی اور پولیس کو مطلوب تھے۔
