قائمہ کمیٹی برائے خزانہ کا محکمہ خزانہ سے بجٹ تفصیلات طلب، تاخیر پر تشویش کا اظہار

پشاور(وقائع نگار) خیبرپختونخوا اسمبلی کی قائمہ کمیٹی برائے خزانہ نے جاری مالی سال اور نئے مالی سال کے بجٹ کی تفصیلات مانگ لی ہیں قائمہ کمیٹی کے چیرمین ارباب عثمان نے تفصیلات نہ ملنے پر مشیر خزانہ کو خط لکھ دیا ہے جس میں انہوں نے محکمہ کی جانب سے دستاویزات فراہم کرنے کا شکوہ کیا ہے، قائمہ کمیٹی برائے خزانہ ارباب عثمان نے مشیر خزانہ مزمل اسلم کے نام لکھے گئے خط میں کہا کہ قائمہ کمیٹی کے چیرمین کی حثیت سے محکمہ خزانہ سے بار بار بجٹ کی تفصیلات کی مانگی گئیں لیکن محکمہ خزانہ بجٹ کی تفصیلات اور معاون دستاویزات فراہم کرنے میں ناکام رہی، بجٹ کی معلومات کی فراہمی میں تاخیر اور صوبائی بجٹ کی منظوری اور اس پر عمل درآمد میں کسی قسم کی التوا انتہائی تشویشناک ہے، بجٹ محض ایک مالیاتی دستاویز نہیں ہے۔ یہ وہ بنیادی دستاویز ہے جس کے ذریعے حکومت خدمات فراہم کرتی ہے، خط میں مشیر خزانہ سے کہا گیا ہے کہ وہ مطلوبہ بجٹ تفصیلات فراہم کریں، محکمہ خزانہ اس بات کو یقینی بنائے کہ صوبائی بجٹ 2026/27 کو بغیر کسی تاخیر کے منظور کیا جائے