خیبر پختونخوا: نویں محرم کے دن بھی خونی واقعات جاری، بچوں اور خواتین سمیت 10 افراد جاں بحق، متعدد زخمی

خیبر پختونخوا میں نویں محرم الحرام کے بابرکت دن بھی صوبہ کے مختلف علاقوں میں پیش آنے والے فائرنگ کے مختلف واقعات کے دوران بچوں اور خواتین سمیت 10 افراد جاں بحق جبکہ کئی افراد زخمی ہوگئے ، صوبے کے مختلف اضلاع میں جائیداد اور دیگر تنازعات پر فائرنگ کے واقعات رپورٹ ہوئے جس میں خواتین اور کم عمر بچے بھی نشانہ بنے ،واقعات کے مطابق لوئر دیر کے علاقے اسبنڑ میں نامعلوم مسلح افراد نے ایک گھر میں گھس کر اندھا دھند فائرنگ کر دی، جس کے نتیجے میں ایک ہی خاندان کے تین افراد جاں بحق ہو گئے،پولیس کے مطابق فائرنگ کے واقعے میں جاں بحق ہونے والوں میں باپ، اس کا اکلوتا بیٹا اور ایک خاتون شامل ہیں،مقتولین کی شناخت قیمت گل، ان کے بیٹے بلال اور ایک خاتون کے طور پر ہوئی ہے،دوسری جانب مردان کے علاقے محلہ قاضی خیل میں جائیداد کے تنازع بھائی نے مبینہ طور پر اپنے سگے بھائی کو فائرنگ کر کے قتل کر دیا،ادھر بنوں کے علاقے شابری کلہ بھرت میں نامعلوم مسلح افراد کی اندھا دھند فائرنگ کے نتیجے میں 5افراد جاں بحق جبکہ ایک خاتون اور ایک کمسن بچی زخمی ہوگئیں،پولیس کے مطابق فائرنگ کے واقعے میں جاں بحق ہونے والوں میں دو سگے بھائی، ان کی والدہ اور دو دیگر افراد شامل ہیں،واقعے کے دوران 17 سالہ سونیہ اور 9 سالہ عائشہ بھی زخمی ہوئیں، جنہیں فوری طور پر طبی امداد کے لیے ہسپتال منتقل کر دیا گیا،پولیس حکام کا کہنا ہے کہ نامعلوم مسلح افراد نے نامعلوم وجوہات کی بنا پر فائرنگ کی، جس کے نتیجے میں ایک ہی خاندان سمیت پانچ افراد جان کی بازی ہار گئے،اسی طرح صوابی کے علاقے زروبی میں ایک شخص نے مبینہ طور پر اپنی چچا زاد بہن پر فائرنگ کر دی، جس سے خاتون شدید زخمی ہو گئی، جبکہ ملزم نے بعد ازاں خود کو گولی مار کر زندگی کا خاتمہ کر لیا۔واقعات کے بعد پولیس اور قانون نافذ کرنے والے اداروں نے کارروائیاں شروع کر دی ہیں جبکہ ملزمان کی گرفتاری اور واقعات کی وجوہات جاننے کے لیے تحقیقات جاری ہیں۔