ایران جنگ رکوانے کی کوششیں جاری ہے اس سلسلے میں پاکستان کی میزبانی میں اہم سفارتی اجلاس پیر کو ہوگا ۔
دفتر خارجہ نے سعودی عرب، ترکیہ اور مصر کے وزرائے خارجہ کے دورہ اسلام آباد کی تصدیق کرتے ہوئے بتایا کہ محمد اسحاق ڈار کی دعوت پر سعودی عرب کے وزیر خارجہ فیصل بن فرحان السعود، ترکیہ کے وزیر خارجہ حکان فیدان اور مصر کے وزیر خارجہ بدر عبدالعاطی 29 سے 30 مارچ 2026 تک اسلام آباد کا اہم دورہ کریں گے۔
چاروں ممالک کے وزرائے خارجہ کے درمیان باہمی دلچسپی کے امور پر تفصیلی تبادلہ خیال کیا جائے گا، جس میں بالخصوص خطے میں کشیدگی کم کرنے اور امن کے قیام سے متعلق کوششیں زیر غور آئیں گی۔
اس موقع پر معزز مہمان شہباز شریف سے بھی ملاقات کریں گے، جس میں دوطرفہ تعلقات اور تعاون کو مزید مضبوط بنانے پر گفتگو متوقع ہے۔
حکومتی ذرائع کے مطابق پاکستان، سعودی عرب، ترکیہ اور مصر جیسے برادر ممالک کے ساتھ اپنے قریبی تعلقات کو نہایت اہمیت دیتا ہے، اور یہ دورہ مختلف شعبوں میں تعاون، ہم آہنگی اور سفارتی روابط کو مزید فروغ دینے کا اہم موقع ثابت ہوگا۔
ترجمان دفتر خارجہ کے مطابق سعودی عرب، ترکیہ اور مصر کے وزرائے خارجہ کل اسلام آباد پہنچیں گے، دوسری جانب وزیر خارجہ اسحاق ڈار کا کہنا ہے کہ سعودی عرب، ترکیہ اور مصر کے برادر وزرائے خارجہ کو اسلام آباد میں خوش آمدید کہنے کا منتظر ہوں۔
