خیبر پختونخوا میں کینسر کے غریب مریض مفت ادویات سے محروم،1500 مریض علاج کے منتظر
خیبرپختونخوا میں کینسر کے غریب مریضوں کے مفت علاج کا برسوں سے جاری فلاحی منصوبہ مالی مشکلات کا شکار ہوگیا ہے جس کے باعث تقریبا 1500 رجسٹرڈ مریض مفت ادویات کے انتظار میں ہیں
کینسر جیسے موذی مرض میں مبتلا غریب خاندانوں کے لیے یہ صورتحال شدید پریشانی کا باعث بن گئی ہےکیونکہ بیشتر مریض مہنگی ادویات اپنی جیب سے خریدنے کی استطاعت نہیں رکھتے
تفصیلات کے مطابق خیبر پختونخوا میں غریب مریضوں کو مفت ادویات فراہم کرنے کا منصوبہ 2011 میں عوامی نیشنل پارٹی کے دور حکومت میں شروع کیا گیا تھا
ابتدائی طور پر اس منصوبے کے تحت صرف بلڈ کینسر کے مریضوں کا علاج کیا جاتا تھاتاہم 2016 میں اس کا دائرہ کار بڑھا کر تمام اقسام کے کینسر کے مریضوں کو شامل کرلیا گیا
یہ منصوبہ حیات آباد میڈیکل کمپلیکس پشاور میں شروع کیا گیا تھاجس کے تحت بعدازاں خیبر ٹیچنگ ہسپتال اور ایوب ٹیچنگ ہسپتال ایبٹ آباد میں بھی مریضوں کو سہولت فراہم کی گئی
اعدادوشمار کے مطابق اس منصوبے سے اب تک 10ہزار سے زائد مریض مستفید ہوچکے ہیں تاہم فنڈز کی کمی کے باعث گزشتہ عرصے سے ادویات کی فراہمی متاثر ہے
جون 2026 کی رپورٹ کے مطابق نئے مالی سال کے بجٹ میں اس منصوبے کے لیے صرف 20 کروڑ روپے مختص کیے گئے جبکہ گزشتہ سال 1.5 ارب روپے مختص تھے ڈاکٹروں کے مطابق یہ رقم 100مریضوں کے علاج کے لیے بھی ناکافی ہے جبکہ تقریبا 1500 مریض ادویات کے منتظر ہیں۔