خیبرپختونخوا کے سیاحتی ضلع سوات میں اربوں روپے مالیت کے متعدد ترقیاتی منصوبوں کا افتتاح اور سنگ بنیاد رکھ دیا گیا۔ ان منصوبوں میں جدید یونیورسٹی، سڑکوں، پل، خصوصی بچوں کے تعلیمی ادارے اور پولیس سہولت مرکز شامل ہیں۔
وزیراعلیٰ خیبرپختونخوا محمد سہیل آفریدی نے ضلع سوات کے دورے کے دوران مختلف ترقیاتی منصوبوں کا افتتاح کرتے ہوئے کہا کہ صوبائی حکومت جدید تعلیم، معیاری انفراسٹرکچر اور عوام کو بہتر بنیادی سہولیات کی فراہمی کو اپنی اولین ترجیح دے رہی ہے۔
اس موقع پر وزیراعلیٰ نے 9 ارب 90 کروڑ روپے کی لاگت سے قائم یونیورسٹی آف کمپیوٹنگ سائنسز اینڈ انفارمیشن ٹیکنالوجی کبل کا باقاعدہ افتتاح کیا۔ حکام نے بریفنگ دیتے ہوئے بتایا کہ یونیورسٹی میں اس وقت بی ایس کے چار اور ایم ایس کے دو پروگرامز جاری ہیں، جبکہ 269 طلبہ زیرِ تعلیم ہیں۔
بعدازاں وزیراعلیٰ نے 39 کروڑ 50 لاکھ روپے کی لاگت سے تعمیر کیے گئے بدلئی پل کا افتتاح بھی کیا، جس سے مقامی آبادی کو بہتر سفری سہولیات میسر آئیں گی اور مختلف علاقوں کے درمیان رابطہ مزید مستحکم ہوگا۔
وزیراعلیٰ نے ایک ارب 43 کروڑ 70 لاکھ روپے کی لاگت سے تعمیر ہونے والے وینئی تا گٹ روڈ منصوبے کا سنگ بنیاد بھی رکھا۔ حکام کے مطابق اس منصوبے کی تکمیل سے آمدورفت میں آسانی پیدا ہوگی اور علاقے کی معاشی سرگرمیوں کو فروغ ملے گا۔
دورے کے دوران 21 کروڑ 40 لاکھ روپے کی لاگت سے تعمیر کیے گئے سپیشل چلڈرن سکول اور سپیشل چلڈرن ٹیچر ٹریننگ سنٹر کا افتتاح بھی کیا گیا۔ منصوبے کا مقصد خصوصی بچوں کو جدید تعلیمی اور تربیتی سہولیات فراہم کرنا ہے۔
اسی موقع پر کبل پولیس سہولت مرکز کا بھی افتتاح کیا گیا، جہاں شہریوں کو پولیس کلیئرنس سرٹیفکیٹ، کریکٹر سرٹیفکیٹ، ڈرائیونگ لائسنس کی تجدید، گاڑیوں کی تصدیق اور دیگر پولیس خدمات ایک ہی مقام پر فراہم کی جائیں گی
