خیبرپختونخوا کے مالاکنڈ ڈویژن میں ٹیکس نفاذ کے خلاف احتجاجی تحریک میں شدت آ گئی ہے۔ بٹ خیلہ میں مالاکنڈ ٹریڈرز فیڈریشن کی اپیل پر تاجروں، مختلف سیاسی جماعتوں، سول سوسائٹی اور شہریوں نے احتجاجی مظاہرہ کیا اور حکومت سے ٹیکس نافذ کرنے کا فیصلہ فوری واپس لینے کا مطالبہ کیا۔
اسی سلسلے میں بٹ خیلہ میں آل پارٹیز اور تاجر نمائندوں کا مشترکہ اجلاس بھی منعقد ہوا، جس میں شرکاء نے مالاکنڈ ڈویژن میں ٹیکس کے نفاذ کو مسترد کرتے ہوئے خطے کی سابقہ ٹیکس فری حیثیت برقرار رکھنے کا مطالبہ کیا۔
مقررین نے کہا کہ مالاکنڈ ڈویژن کے عوام پر ٹیکس کا نفاذ ناقابل قبول ہے اور حکومت کو علاقے کے آئینی و قانونی حقوق کا احترام کرتے ہوئے اپنے فیصلے پر نظرثانی کرنی چاہیے۔
اجلاس میں تاجر رہنماؤں اور سیاسی نمائندوں نے خبردار کیا کہ اگر مطالبات تسلیم نہ کیے گئے تو احتجاجی تحریک کو مزید وسعت دی جائے گی۔ شرکاء نے آئندہ کے احتجاجی شیڈول اور مشترکہ حکمت عملی پر بھی غور کیا اور مالاکنڈ ڈویژن کے حقوق کے تحفظ کے لیے مشترکہ لائحہ عمل اپنانے پر اتفاق کیا۔
