سابق ڈپٹی سپیکر کے قتل کا منصوبہ ناکام، ملزمان گرفتار، اسلحہ برآمد

پشاور پولیس نے کامیاب کارروائی کرتے ہوئے سابق ڈپٹی سپیکر کے قتل کا منصوبہ ناکام بناتے ہوئے دو ملزمان گرفتار کر لئے اور ان سے اسلحہ و موٹرسائیکل برامد کر لی۔
واقعات کے مطابق پشاور پولیس نے ایک اور بڑی کارروائی کرتے ہوئے سابق ڈپٹی سپیکر محمود جان پر حملے کی کوشش ناکام بنا دی، اس موقع پر محمود جان کےساتھ ان کے کزن بھی تھے، تاہم پولیس نے اس کارروائی میں دو ملزمان گرفتار کر لئے، جبکہ ان سے اسلحہ و موٹر سائیکل بھی برآمد کر لی۔
پولیس ذرائع کے مطابق گرفتار ملزمان حارث ولد تاج الدین اور موسی خان ولد افسر خان کا تعلق عیسیٰ خیل سفید سنگ سے بتایا گیا ہے، پولیس نے بتایا ہے کہ ملزمان اپنے مذموم مقاصد کیلئے منصوبہ بندی کے تحت مخالفین کو ٹارگٹ کرنے جا رہے تھے کہ دھر لئے گئے۔
سابق ڈپٹی سپیکر کے قتل کا منصوبہ ناکام بنانے کے حوالے سے سی سی پی او پشاور ڈاکٹر میان سعید نے بتایا کہ ملزمان پشتخرہ دورہ روڈ سفید ڈھیری سے گرفتار ہوئے ہیں اور ان کے خلاف ایف آئی آر درج کر کے مزید تفتیش شروع کر دی ہے۔