موجودہ دور میں موبائل فون انسانی زندگی کا لازمی حصہ بن چکا ہے، تاہم ماہرین نے خبردار کیا ہے کہ دن کے آغاز میں جاگتے ہی موبائل فون استعمال کرنا صحت اور ذہنی سکون کے لیے نقصان دہ ہو سکتا ہے۔
رپورٹس کے مطابق تقریباً 84 فیصد صارفین صبح جاگتے ہی یا پندرہ منٹ کے اندر موبائل استعمال کرنا شروع کر دیتے ہیں۔ ماہرین کا کہنا ہے کہ نیند سے فوراً بیدار ہونے کے بعد دماغ گہرے سکون کی حالت میں ہوتا ہے، اور فوری موبائل استعمال اسے اچانک مکمل سرگرمی کی حالت میں لے آتا ہے، جس سے ذہنی دباؤ، بے چینی، تھکن اور چڑچڑاپن بڑھ سکتا ہے۔
ماہرین نے مشورہ دیا ہے کہ جاگنے کے بعد کم از کم تیس منٹ سے ایک گھنٹہ تک موبائل فون استعمال نہ کیا جائے تاکہ دماغ قدرتی طور پر بیدار ہو سکے۔ علاوہ ازیں، سونے سے پہلے موبائل فون استعمال کرنے کے بڑھتے ہوئے رجحان پر بھی تشویش ظاہر کی گئی ہے، کیونکہ یہ نیند کے معمولات اور جسمانی و ذہنی صحت پر منفی اثر ڈال سکتا ہے۔
صارفین کو ہدایت دی گئی ہے کہ موبائل فون کا استعمال اعتدال اور مناسب وقت کے مطابق کریں تاکہ ذہنی اور جسمانی صحت کو بہتر بنایا جا سکے۔
