اگر آپ کی مصروف زندگی میں ورزش کے لیے وقت نہیں نکل پاتا، تو چھوٹے وقفے میں کی جانے والی مختصر جسمانی سرگرمیاں بھی آپ کو فٹ رکھ سکتی ہیں۔
ٹورنٹو یونیورسٹی کی تحقیق میں بتایا گیا ہے کہ دن میں 2 منٹ تک سیڑھیاں تیزی سے چڑھنا اور اترنا، دل اور نظام تنفس کی فٹنس بڑھانے میں مددگار ثابت ہوتا ہے۔ اس کے ساتھ ساتھ یہ طویل عرصے تک بیٹھنے کے منفی اثرات کو بھی کم کرتا ہے۔
تحقیق میں 20 سے 30 سال کی عمر کے 12 افراد شامل تھے جنہیں دن بھر بیٹھنے کے دوران ہر 30 منٹ بعد اٹھ کر 2 منٹ چلنے یا سیڑھیاں چڑھنے کی ہدایت دی گئی۔ چھ ہفتوں کے بعد ان افراد کی ایروبک فٹنس اور ٹانگوں کی مضبوطی میں نمایاں بہتری دیکھی گئی۔
ماہرین کے مطابق دفتر یا گھر میں چھوٹے وقفے کی یہ جسمانی سرگرمی مسلز کی مرمت اور حجم بڑھانے میں بھی مدد دیتی ہے، اور لمبے عرصے تک بیٹھنے سے پیدا ہونے والے ہائی بلڈ شوگر اور کولیسٹرول کے خطرات کو کم کرتی ہے۔
محققین کا کہنا ہے کہ دل کی دھڑکن بڑھانے والی کوئی بھی سرگرمی، چاہے اس کا دورانیہ ایک سے دو منٹ ہو، ورزش کے فوائد فراہم کر سکتی ہے۔ قارئین کو مشورہ دیا گیا ہے کہ صحت سے متعلق معلومات کے لیے اپنے معالج سے رابطہ کریں۔
