صوبائی دارالحکومت پشاور میں فائرنگ واقعات میں اضافہ ہونے لگا، گزشتہ 24 گھنٹوں کے دوران پشاور میں فائرنگ واقعات کے دوران 2 افراد قتل کئے گئے ہیں، ایک ارمڑ میں جبکہ دوسرا تھانہ خزانہ کی حدود میں رونما ہوا۔
پشاور کے علاقے ارمڑ میں نامعلوم افراد نے زمینداری کرنے والے گھر کے واحد کفیل کو قتل کر دیا، مقتول گزشتہ شام سے لاپتہ تھا، جس کی نعش اگلی صبح برآمد ہوئی۔
پولیس نے نامعلوم قاتلوں کا سراغ لگانے کیلئے مقتول کے موبائل ڈیٹا اور دیگر شواہد پر کام شرو ع کردیا ہے، قتل کیس میں ملوث افراد کاسراغ لگانے کیلئے مختلف پہلووں سے تفتیش شروع کردی اور مشکوک افراد کو شامل تفتیش کیاجائے گا۔
واقعہ سے متعلق دختر شمس القمر سکنہ ارمڑ بالا نے بتایا کہ اس کا 40 سالہ بھائی رحیم خان اراضیات میں کام کرنے کیلئے گیا لیکن شام گئے تک گھر نہیں لوٹا۔
انہوں نے بتایا کہ وہ اپنے گمشدہ بھائی کی تلا ش کررہے تھے کہ اس دوران اطلاع ملی کہ رحیم کی قتل شدہ نعش ارمڑ بالا ہوائی ونڈ کے علاقے میں پڑی ملی ہے مدعیہ نے بتایاکہ ان کی کسی کے ساتھ کوئی دشمنی نہیں ہے۔
ورثا کے مطابق مقتول کا 3سالہ بیٹا یتیم ہوگیا ہے اور وہ اپنی بیمار والدہ اور بہنوں کا واحد سہارا تھاجو ان سے چھین لیا گیا، جبکہ دوسری طرف رحیم کا والد بھی جاں بحق ہو چکا ہے۔
تھانہ خزانہ کی حدود میں نامعلوم افراد نے 38سالہ شخص کو فائرنگ کرکے قتل کردیا، پولیس نے سی سی ٹی وی کیمروں کی فوٹیج ودیگر شواہد کے ذریعے نامعلوم قاتلوں کی تلاش شروع کردی ہے ۔
تھانہ خزانہ پولیس کے مطابق بیڑئی گودر شاہ عالم میں تخت آباد کے مقام پر نوجوان کی قتل شدہ نعش پڑی ملی ، واقعہ سے متعلق جہانگیر ولد حجرت میر سکنہ شاہین مسلم ٹاون نے بتایا کہ وہ فقیر آباد میں دکان میں موجود تھا کہ اطلاع ملی کہ اس کے بھائی محمد وصال کو نامعلوم افراد نے فائرنگ کرکے قتل کردیا ہے ۔
اطلاع ملنے پر وہ جائے وقوعہ پر پہنچا تو وصال کی خون میں لت پت نعش پڑی تھی ۔ انہوں نے بتایاکہ ہماری کسی کے ساتھ کوئی دشمنی نہیں ہے ۔پولیس نے نعش پوسٹمارٹم رپورٹ کیلئے منتقل کرکے مختلف پہلووں سے تفتیش کا آغاز کردیا ہے ۔
