خیبر پختونخوا کے ضلع ہنگو میں سیکیورٹی فورسز کا آپریشن کامیاب رہا، اس دوران 7 خوارج ہلاک کر دیئے گئے، جبکہ فائرنگ کے تبادلہ میں کیپٹن حمزہ اکرم جام شہادت نوش کر گئے۔
تفصیلات کے مطابق پاک فوج کے شعبہ تعلقات عامل آئی ایس پی آر کے مطبق ضلع ہنگو میں سیکیورٹی فورسز نے انٹیلی جنس بیسڈ آپریشن کے دوران 7 خوارج ہلاک کردیئے، 7 اگست 2026 کو ہنگو ضلع میں بھارتی پراکسی سے وابستہ فتنہ الخوارج کے دہشتگردوں کی موجودگی کی اطلاع پر انٹیلی جنس بیسڈ آپریشن کیا گیا۔
ترجمان پاک فوج کے مطابق آپریشن کے دوران سیکیورٹی فورسز نے خوارج کے ٹھکانے کو مثر انداز میں نشانہ بنایا، آئی ایس پی آر کے مطابق دہشتگردوں نے فائرنگ کے دوران ایک مسجد میں پناہ لینے کی کوشش کی۔
اس دوران ہونیوالی شدید فائرنگ کے تبادلے میں 7 خوارج ہلاک ہوگئے، جبکہ ہلاک دہشتگردوں سے اسلحہ اور گولہ بارود بھی برآمد کیا گیا۔
آئی ایس پی آر کے مطابق ہلاک ہونے والے خوارج سیکیورٹی فورسز، قانون نافذ کرنے والے اداروں پر متعدد دہشتگرد حملوں اور بے گناہ شہریوں کے قتل میں ملوث رہے تھے۔
ترجمان پاک فوج کے مطابق آپریشن کی قیادت کرنے والے 27 سالہ کیپٹن حمزہ اکرم نے جوانوں کی فرنٹ سے قیادت کرتے ہوئے بہادری سے مقابلہ کیا اور وطن کے دفاع میں جام شہادت نوش کیا۔ کیپٹن حمزہ اکرم کا تعلق ضلع نارووال سے تھا۔
آئی ایس پی آر کے مطابق علاقے میں ممکنہ دیگر بھارتی سرپرستی میں موجود خوارج کے خاتمے کے لیے سینیٹائزیشن آپریشن جاری ہے۔
ترجمان پاک فوج کا کہنا ہے کہ سیکیورٹی فورسز اور قانون نافذ کرنے والے اداروں کی جانب سے عزمِ استحکام کے تحت ملک سے غیر ملکی سرپرستی اور حمایت یافتہ دہشتگردی کے خاتمے کی کارروائیاں پوری رفتار سے جاری رہیں گی۔
پاک فوج کے شعبہ تعلقات عامہ کے مطابق قوم کے بہادر سپاہیوں کی قربانیاں ملک کے تحفظ کے عزم کو مزید مضبوط کرتی ہیں اور پاکستان کی سلامتی کے لیے ہر قیمت پر دفاع کا عزم برقرار رہے گا۔
