پشاور میں اینٹی نارکوٹکس فورس نے پشاور کے حسن گڑھی اور ملاکنڈھیر میں رہائشی مکانات میں غیر معیاری نشہ آور گولیوں کی تیاری میں ملوث 2 گروہوں کے خلاف کارروائی کرتے ہوئے منشیات کی تیاری اور تقسیم میں ملوث عناصر کے خلاف اہم کامیابی حاصل کرلی۔
ترجمان اے این ایف کے مطابق خفیہ معلومات کی بنیاد پر حسن گڑھی پشاور میں واقع ایک رہائشی مکان پر چھاپہ مارا گیا، جہاں غیر قانونی طور پر نشہ آور گولیاں (K-Tablets) تیار کی جا رہی تھیں۔ کارروائی کے دوران منشیات کی تیاری میں استعمال ہونے والی مشینری، 25.910 کلوگرام مختلف اقسام کا کیمیکل، 4500 تیار شدہ نشہ آور گولیاں اور منشیات کی ترسیل کے لیے استعمال ہونے والی 3 گاڑیاں قبضے میں لے لی گئیں۔
کارروائی کے دوران 4 ملزمان کو گرفتار کیا گیا، جن میں ایک فارماسسٹ بھی شامل ہے جو غیر قانونی سیٹ اپ کا نگران تھا۔ دوران تفتیش ملزمان نے انکشاف کیا کہ وہ مذکورہ سیٹ اپ سے تقریباً 90 ہزار سے ایک لاکھ گولیاں ماہانہ تیار کر رہے تھے۔
ترجمان کے مطابق دوسری کارروائی پشاور کے ناصر باغ روڈ ملاکنڈھیر میں کی گئی، جہاں پشاور سے گرفتار دوسرے ملزم کی نشاندہی پر ایک رہائشی مکان پر چھاپہ مار کر غیر قانونی مینوفیکچرنگ یونٹ بے نقاب کیا گیا اور موقع سے ایک اور ملزم کو گرفتار کرلیا گیا۔
کارروائی کے دوران مذکورہ گھر سے 4.500 کلوگرام تیار شدہ اور تیاری کے مراحل میں موجود ایکسٹیسی ٹیبلٹس، خام مال اور ٹیبلٹس بنانے والی مشین برآمد کی گئی۔
ترجمان اے این ایف کے مطابق پکڑے جانے والے سیٹ اپ انتہائی سادہ، ابتدائی نوعیت اور مقامی سطح پر قائم کیے گئے غیر معیاری یونٹ تھے، جو کسی باقاعدہ فارماسیوٹیکل مینوفیکچرنگ سہولت کے معیار کے حامل نہیں تھے، جن میں تیار ہونے والی منشیات جان لیوا ثابت ہوسکتی تھیں۔
ترجمان کا کہنا ہے کہ ان نشہ آور گولیوں کا ہدف نوجوان نسل ہے۔ نوجوان نسل کو منشیات کے ناسور سے محفوظ رکھنے کے لیے اے این ایف تمام دستیاب وسائل بروئے کار لا رہی ہے، تاہم منشیات کے خلاف جنگ ایک ادارے کی نہیں بلکہ سب کی اجتماعی قومی ذمہ داری ہے۔
ترجمان اینٹی نارکوٹکس فورس پاکستان کے مطابق اے این ایف منشیات سے پاک معاشرے کے مشن پر پورے عزم اور قوت کے ساتھ سرگرمِ عمل ہے۔
