پشاور: وزیراعلیٰ خیبرپختونخوا محمد سہیل آفریدی نے ضلع لوئر دیر کا مختصر دورہ کیا، جہاں انہوں نے گزشتہ روز دہشت گرد حملے میں زخمی ہونے والے پولیس اہلکاروں کی عیادت کی۔
وزیراعلیٰ نے زیرِ علاج اہلکاروں کی خیریت دریافت کی، ان کی صحت سے متعلق معلومات حاصل کیں اور انہیں فراہم کی جانے والی طبی سہولیات کا جائزہ لیا۔ انہوں نے متعلقہ حکام کو ہدایت کی کہ زخمی اہلکاروں کو علاج معالجے کی بہترین سہولیات بلا تعطل فراہم کی جائیں اور علاج میں کسی قسم کی غفلت نہ برتی جائے۔
اس موقع پر وزیراعلیٰ محمد سہیل آفریدی نے زخمی اہلکاروں کی جلد صحت یابی کے لیے نیک تمناؤں کا اظہار کرتے ہوئے کہا کہ دہشت گردی کے خلاف جنگ میں خیبرپختونخوا پولیس کی لازوال قربانیاں پوری قوم کا فخر ہیں۔ انہوں نے کہا کہ پولیس کے بہادر جوانوں نے امن کے قیام اور عوام کے جان و مال کے تحفظ کے لیے بے مثال قربانیاں دی ہیں، جنہیں ہمیشہ قدر کی نگاہ سے یاد رکھا جائے گا۔
وزیراعلیٰ نے کہا کہ شہداء کے لواحقین اور زخمی اہلکاروں کو ہر ممکن معاونت اور سہولت فراہم کی جائے گی، حکومت اپنے شہداء اور غازیوں کو کبھی تنہا نہیں چھوڑے گی اور ان کی فلاح و بہبود کے لیے تمام دستیاب وسائل بروئے کار لائے جائیں گے۔
انہوں نے اس عزم کا اظہار کیا کہ دہشت گردی کے ناسور کے مکمل خاتمے تک یہ جنگ پوری قوت سے جاری رہے گی اور بزدلانہ دہشت گرد کارروائیاں حکومت، پولیس اور عوام کے عزم و حوصلے کو ہرگز متزلزل نہیں کر سکتیں۔
انسپکٹر جنرل پولیس خیبرپختونخوا ذوالفقار حمید بھی اس موقع پر وزیراعلیٰ کے ہمراہ موجود تھے۔
