خیبر پختونخوا محکمہ ابتدائی و ثانوی تعلیم نے صوبے کے سرکاری سکولوں میں فرنیچر کی مرمت، بلیک بورڈز کی جگہ وائٹ بورڈز کی تنصیب اور تیسری فیز کے تحت فرنیچر کی فراہمی مکمل کرنے کے لیے تمام ضلعی تعلیمی افسران کو سخت ہدایات جاری کردی ہیں
ڈائریکٹوریٹ آف ایلیمنٹری اینڈ سیکنڈری ایجوکیشن کی جانب سے جاری مراسلے کے مطابق 11 ستمبر کو سیکرٹری ایلیمنٹری اینڈ سیکنڈری ایجوکیشن کے ساتھ ہونے والے اجلاس میں کیے گئے فیصلوں پر فوری عملدرآمد یقینی بنایا جائے گا۔
محکمہ نے ڈی ای اوز کو ہدایت کی ہے کہ مرمت کے قابل فرنیچر کی مکمل صورتحال واضح کی جائے اور اس امر کا سرٹیفکیٹ بھی جمع کرایا جائے کہ ضلع میں مرمت کے قابل فرنیچر موجود نہیں اور آئندہ کی ضروریات حقیقی ضرورت کی بنیاد پر ہیں
اسی طرح پرائمری، مڈل، ہائی اور ہائر سیکنڈری سکولوں میں موجود بلیک بورڈز کو منظور شدہ معیار اور ضرورت کے مطابق وائٹ بورڈز میں تبدیل کرنے کا عمل مکمل کیا جائے گا
مراسلے میں ضلعی حکام کو مزید پابند کیا گیا ہے کہ فرنیچر، اے سی آر اور دیگر متعلقہ امور سے متعلق گوگل ڈیٹا شیٹ روزانہ اپ ڈیٹ کی جائے اور کام کی تکمیل تک پیش رفت کا باقاعدگی سے جائزہ لیا جائے
تیسری فیز کے تحت کابینہ سے منظور شدہ فرنیچر کی سو فیصد فراہمی مکمل ہونے کے بعد متعلقہ ڈی ای او کو کمپلیشن سرٹیفکیٹ کے ساتھ ایس آئی ڈی بی سے مکمل سپلائی کا چالان یا دیگر قابلِ تصدیق ثبوت بھی جمع کرانا ہوگا
محکمہ تعلیم نے واضح کیا ہے کہ جمع کرائی جانے والی معلومات میں کسی غلطی یا تضاد کی براہِ راست ذمہ داری متعلقہ ضلعی ایجوکیشن آفیسر پر عائد ہوگی۔
