پتوکی میں ایک شخص کو مبینہ طور پر نوکری کا جھانسہ دے کر اغوا کرنے اور اس کا گردہ نکال کر فروخت کرنے کا انکشاف ہوا ہے۔ پولیس نے مقدمہ درج کرکے مرکزی ملزم کی تلاش شروع کر دی ہے۔
پولیس کے مطابق پتوکی کے رہائشی رحمت کو اس کے دوست رضا نے 26 جون کو نوکری دلانے کے بہانے اپنے ساتھ لے گیا۔ الزام ہے کہ ملزم اسے راولپنڈی لے گیا، جہاں اسے مبینہ طور پر نشہ آور مشروب پلایا گیا۔ بےہوش ہونے کے بعد اس کا ایک گردہ نکال کر فروخت کر دیا گیا۔
پولیس کا کہنا ہے کہ رحمت کے مبینہ اغوا کا مقدمہ 12 جولائی کو اس کے بہنوئی کی مدعیت میں درج کیا گیا تھا، تاہم بعد ازاں رحمت خود گھر واپس پہنچ گیا اور اس نے اپنے ساتھ پیش آنے والے واقعے سے متعلق آگاہ کیا۔
پولیس نے واقعے کی تحقیقات شروع کر دی ہیں جبکہ مرکزی ملزم رضا کی گرفتاری کے لیے چھاپے مارے جا رہے ہیں۔ پولیس کا کہنا ہے کہ ملزم کی گرفتاری اور تفتیش کے بعد مزید حقائق سامنے آئیں گے۔
