جماعت اول تا پنجم میں انگریزی، اردو، ریاضی، اسلامیات اور جنرل سائنس شامل تیسری کلاس تک جنرل نالج اور جماعت چہارم و پنجم میں سماجی علوم نصاب کا حصہ ہوں گے
خیبر پختونخوا میں ابتدائی جماعتوں کے نصاب کو آسان اور بنیادی تعلیمی مہارتوں پر مرکوز کرنے کا فیصلہ کرتے ہوئے جماعت اول تا پنجم کیلئے نیا خیبر پختونخوا کریکولم نافذ کردیا گیا ہے جس کا اطلاق تعلیمی سال 2027سے ہوگا
ڈائریکٹوریٹ آف کریکولم اینڈ ٹیچر ایجوکیشن خیبر پختونخوا کی جانب سے جاری نوٹیفکیشن کے مطابق صوبائی حکومت کی ہدایات اور گڈ گورننس روڈ میپ کے تحت ابتدائی درجات کے نصاب کو آسان بنانے کا فیصلہ کیا گیا ہے
نئے نصاب کے تحت جماعت اول تا پنجم میں انگریزی، اردو، ریاضی، اسلامیات اور جنرل سائنس شامل ہوں گے جبکہ جماعت اول تا سوم میں جنرل نالج اور جماعت چہارم و پنجم میں سوشل سٹڈیز بھی نصاب کا حصہ ہوں گے
نوٹیفکیشن کے مطابق خیبر پختونخوا ٹیکسٹ بک بورڈ نئے نصاب کی روشنی میں جماعت اول تا پنجم کی درسی کتب تیار یا نظرثانی کرے گا
صوبے کے تمام سرکاری اور نجی تعلیمی اداروں کو صرف وہی نصابی کتب استعمال کرنے کی اجازت ہوگی جو خیبر پختونخوا کریکولم 2026 کے مطابق اور ڈائریکٹوریٹ آف کریکولم اینڈ ٹیچر ایجوکیشن سے منظور شدہ ہوںنجی ناشرین کیلئے بھی نئی شرط عائد کی گئی ہے کہ نصابی یا ضمنی کتب کی اشاعت سے قبل ڈائریکٹوریٹ آف کریکولم اینڈ ٹیچر ایجوکیشن خیبر پختونخوا، ایبٹ آباد سے پیشگی منظوری اور این او سی حاصل کرنا ہوگا
نوٹیفکیشن میں مزید کہا گیا ہے کہ ترقیاتی شراکت دار اور ڈائریکٹوریٹ آف پروفیشنل ڈویلپمنٹ بھی اپنے تربیتی مواد کو نئے نصاب سے ہم آہنگ کریں گے حکام کے مطابق نصاب، منظور شدہ درسی کتب اور تعلیمی معیار سے متعلق مقررہ ضوابط کی خلاف ورزی کی صورت میں متعلقہ اداروں اور فرموں کے خلاف خیبر پختونخوا نصاب، درسی کتب اور تعلیمی معیار کی نگرانی ایکٹ 2011کے تحت کارروائی کی جائے گی۔
