پیٹرول 74، ڈیزل 67روپے فی لیٹر سستا، وزیراعظم کا بڑا اعلان

وزیراعظم محمد شہباز شریف نے پیٹرولیم مصنوعات کی قیمتوں میں بڑی کمی کا اعلان کرتے ہوئے کہا ہے کہ خطے میں معاشی صورتحال میں بہتری اور عالمی منڈی میں تیل کی قیمتوں میں کمی کا فائدہ فوری طور پر عوام تک منتقل کیا جا رہا ہے۔ وزیراعظم آفس سے جاری اعلامیہ کے مطابق پیٹرول کی قیمت میں 74روپے فی لیٹر جبکہ ہائی اسپیڈ ڈیزل کی قیمت میں 67روپے فی لیٹر کمی کی جا رہی ہے۔ قیمتوں میں کمی کے بعد پیٹرول کی قیمت 373 روپے سے کم ہو کر 299 روپے فی لیٹر جبکہ ڈیزل کی قیمت 378 روپے سے کم ہو کر 311 روپے فی لیٹر ہو جائے گی۔ وزیراعظم شہباز شریف نے کہا کہ حکومت نے قوم سے جو وعدہ کیا تھا، اللہ کے فضل سے اسے پورا کر رہی ہے۔ انہوں نے کہا کہ عوام نے مشکل حالات میں صبر و تحمل کا مظاہرہ کیا اور حکومت ان کے تعاون پر شکر گزار ہے۔ وزیراعظم کا کہنا تھا کہ بحران کے دوران وفاقی حکومت نے ترقیاتی بجٹ اور کفایت شعاری سے حاصل ہونے والی بچت سے 129 ارب روپے استعمال کر کے عوام کو ممکنہ حد تک ریلیف فراہم کیا۔ انہوں نے کہا کہ حکومت کی موثر حکمت عملی کے باعث ملک میں پیٹرولیم مصنوعات کی قلت پیدا نہیں ہوئی، نہ ہی عوام کو لمبی قطاروں یا راشننگ جیسے مسائل کا سامنا کرنا پڑا۔ وزیراعظم نے کہا کہ عالمی منڈی میں تیل کی قیمتوں میں جتنی کمی آئے گی، اس کا فائدہ من و عن عوام کو منتقل کیا جائے گا اور مہنگائی میں مزید کمی کے لیے اقدامات جاری رکھے جائیں گے۔ شہباز شریف نے خطے میں امن کے قیام کے لیے پاکستان کی سفارتی کوششوں کا ذکر کرتے ہوئے کہا کہ مشرق وسطی میں کشیدگی کے خاتمے اور امن معاہدے کے نتیجے میں معاشی صورتحال بہتر ہوئی ہے، جس کا براہ راست فائدہ پاکستانی عوام کو پہنچایا جا رہا ہے۔ انہوں نے فیلڈ مارشل سید عاصم منیر، نائب وزیراعظم اسحاق ڈار، وزیر داخلہ محسن نقوی اور معاشی ٹیم کی خدمات کو بھی سراہا اور کہا کہ عوام کو زیادہ سے زیادہ ریلیف فراہم کرنا حکومت کی اولین ترجیح ہے