ایئر چیف مارشل ظہیر احمد بابر سدھو نے کہا ہے کہ مئی میں دشمن پاکستان کی عسکری مہارت اور طاقت دیکھ کر حیران رہ گیا تھا۔
پاکستان ملٹری اکیڈمی کاکول میں پاسنگ آؤٹ پریڈ کی تقریب سے بطور مہمانِ خصوصی خطاب کرتے ہوئے انہوں نے کہا کہ معرکہ حق اور بنیان المرصوص کے دوران پاکستان آرمی کی حکمت عملی کو دنیا نے تسلیم کیا، جبکہ پاکستان ائیر فورس نے دشمن کے جہاز گرا کر تاریخ رقم کی۔
انہوں نے کہا کہ پاکستان کی سیاسی اور عسکری قیادت عالمی سطح پر امن کے فروغ کے لیے مخلصانہ کوششیں کر رہی ہے۔ پاکستان ایک پرامن ملک ہے جو تنازعات کے حل کے لیے مذاکرات پر یقین رکھتا ہے۔
ایئر چیف مارشل نے واضح کیا کہ پاکستان کیخلاف کسی بھی جارحیت کا بھرپور اور منہ توڑ جواب دیا جائے گا۔ انہوں نے کہا کہ پاکستان ہمیشہ بھارت کے زیرِ قبضہ کشمیر کے عوام کی اخلاقی و سفارتی حمایت جاری رکھے گا۔ کیڈٹس کی بنیادی ذمہ داری ملک کی سلامتی اور دفاع کو یقینی بنانا ہے۔
پاسنگ آؤٹ پریڈ میں 153 ویں پی ایم اے لانگ کورس، 38 ویں ٹیکنیکل گریجویٹ کورس، 72 ویں انٹیگریٹڈ کورس، 15 ویں مجاہد کورس اور 27 ویں لیڈی کیڈٹ کورس کے کیڈٹس نے شرکت کی۔
