خیبر پختونخوا کے گورنر فیصل کریم کنڈی کے خلاف سینیٹر خرم ذیشان نے قانونی کارروائی کا اعلان کرتے ہوئے 5 کروڑ روپے ہرجانے کا نوٹس بھجوانے کا فیصلہ کیا ہے
سینیٹر خرم ذیشان کے مطابق ان کے وکیل کی جانب سے قانونی نوٹس 20 نومبر کو گورنر کو ارسال کیا جائے گا، جبکہ نوٹس کی نقل سوشل میڈیا پر بھی جاری کردی گئی ہے
قانونی نوٹس میں مؤقف اختیار کیا گیا ہے کہ گورنر فیصل کریم کنڈی نے 14 نومبر کو پشاور میں پریس کانفرنس کے دوران سینیٹر خرم ذیشان پر خیبر پختونخوا میں غیرقانونی سونے کی کان کنی، خصوصاً کوہاٹ اور درہ آدم خیل میں سرگرمیوں کی سرپرستی اور کالعدم دہشت گرد تنظیموں سے روابط کے الزامات عائد کیے تھے
نوٹس میں ان الزامات کو بے بنیاد، جھوٹا اور ساکھ متاثر کرنے کی کوشش قرار دیتے ہوئے کہا گیا ہے کہ سینیٹر خرم ذیشان ان الزامات کی تردید کرتے ہیں اور ان کے خلاف کسی قسم کی ایف آئی آر یاپولیس مقدمہ درج نہیں
قانونی نوٹس میں مزید مؤقف اختیار کیا گیا ہے کہ ایسے الزامات سے نہ صرف سینیٹر کی سیاسی اور عوامی ساکھ متاثر ہوئی بلکہ ان کی اور ان کے خاندان کی سلامتی کو بھی خطرات لاحق ہوئے ہیں
نوٹس کے ذریعے گورنر سے مطالبہ کیا گیا ہے کہ وہ 14 روز کے اندر الزامات واپس لیں، غیرمشروط تحریری اور عوامی معافی مانگیں، آئندہ ایسے بیانات دینے سے گریز کریں اور ہرجانے کی مد میں 5 کروڑ روپے ادا کریں
سینیٹر خرم ذیشان نے قانونی نوٹس میں یہ بھی کہا ہے کہ مطالبات پورے نہ ہونے کی صورت میں ان کے وکیل کو مزید قانونی کارروائی اور ہتک عزت کا مقدمہ دائر کرنے کی ہدایت کردی گئی ہے۔