خیبرپختونخوا کے مختلف علاقوں میں ممکنہ سیلاب کے خطرے کے پیش نظر 8 اضلاع میں تمام متعلقہ اداروں کو الرٹ کردیا گیا ہے جبکہ ہنگامی صورتحال سے نمٹنے کے لیے ضروری اقدامات کی ہدایات جاری کردی گئی ہیں۔
دریائے سوات، دریائے کابل اور دیگر دریاوں میں پانی کے بہاو میں اضافے کے خدشے کے باعث دریا کے قریبی علاقوں میں رہائش پذیر افراد کو احتیاطی طور پر جزوی طور پر مکانات خالی کرنے کی ہدایات بھی دی گئی ہیں۔
این ڈی ایم اے کے نیشنل ایمرجنسیز آپریشن سینٹر کی جانب سے جاری الرٹ کے مطابق 17 ستمبر تک ملک کے مختلف علاقوں میں سیلاب کا خطرہ موجود ہے۔
خیبرپختونخوا کے اپر دیر، سوات، باجوڑ، ملاکنڈ، کرم، کوہستان، مہمند اور اورکزئی میں سیلابی صورتحال پیدا ہونے کا خدشہ ظاہر کیا گیا ہے۔
این ڈی ایم اے کے مطابق بالائی علاقوں میں متوقع بارشوں کے باعث دریاوں، ندی نالوں اور برساتی نالوں میں پانی کے بہاو میں اضافہ ہوسکتا ہے، جس کے نتیجے میں نشیبی اور دریا کے قریبی علاقوں کو خطرات لاحق ہوسکتے ہیں۔
الرٹ میں اسلام آباد، بلوچستان کے ژوب، شیرانی اور موسی خیل جبکہ پنجاب کے راولپنڈی، گوجرانوالہ، سرگودھا، جھنگ، ٹوبہ ٹیک سنگھ اور شیخوپورہ کے شہری علاقوں میں بھی ممکنہ سیلابی صورتحال کا خدشہ ظاہر کیا گیا ہے۔
این ڈی ایم اے نے تمام متعلقہ اداروں کو پیشگی اقدامات مکمل رکھنے، ہنگامی صورتحال سے نمٹنے کے لیے تیار رہنے اور عوام کو بروقت آگاہ کرنے کی ہدایت کی ہے۔
